Presentât vuê a Udin il gnûf bant regjonâl pal supuart aes impresis vuidadis di zovins. “E je une sielte strategjiche garantî une poie concrete – al à dit l’assessôr regjonâl aes Ativitâts produtivis – ae imprenditorie gjestide dai zovins”.
Il bant che al jere za stât fat tai agns passats, al dâ atuazion a une misure aprovade dal Consei regjonâl e al previôt la concession di contribûts a font pierdût a pro des impresis, start-up e spin-off de ricercje metudis su di imprenditôrs sot dai 40 agns. Lis impresis a varan cussì di vê tra i lôr aministradôrs e i socis une maiorance di zovins.
Il contribût, che al podarà cuvierzi fintremai dal 50% de spese dal progjet che al à di ve un valôr di almancul 10 mil euros, al rivarà fin ai 40 mil euros. Lis domandis a podaran jessi presentadis dai 24 di Fevrâr doprant il sît internet de Regjon. In dut a son a disposizion passe trê milions di euros. (a.d.g.) – 05.02.2026
