“La sieradure dal repart di vernisadure inte fabriche Snaidero di Maian e je sbaliade e e à consecuencis seriis sui nivei de ocupazion e su la competitivitât de aziende. O domandìn rispiet par ducj i lavoradôrs dal grup Snaidero, che a son stâts informâts de sieradure dal repart dilunc di un procès di amortizadôrs sociâi, condividût cuant che al è stât inviât e finît cence nissune discussion. Cheste e je une decision inacetabil”, a àn dit Fabio Del Carro, de Filca-Cisl nazionâl, e Paolo Fregonese, segretari gjenerâl dal Filca-Cisl dal Friûl – Vignesie Julie.
“I lavoradôrs – a spieghin i doi sindicaliscj – a viodin decisions aziendâls discutibilis par agns, dulà che a no son coinvolts, ancje cuant che a rivuardin aspiets organizatîfs e di produzion, par ricevi daspò un avîs di sierade. Altri che partecipazion! Chestis decisions a àn puartât ae pierdite di plui o mancul cent puescj di vore intai ultins siet agns. Di une aziende che e vante ecelence, si spietin, prin di dut, decisions metodologjichis che a cjapin dentri i lavoradôrs e i lôr rapresentants, che a àn mantignût la coesion sociâl e il lustri de aziende par agns. Il rispiet pai lavoradôrs al ven di un compuartament concret, sedi industriâl sedi leât al sindicât, e lis azions inviadis de aziende a no rifletin lis relazions che a coventin pal rilanç e une strategjie che a mantegni la ocupazion. O sin dongje ai lavoradôrs che a stan protestant vuê denant de aziende, des lôr fameis, e di dute la comunitât aziendâl. O stin valutant dutis lis azions pussibilis par meti a puest cheste situazion serie e inacetabil,” a concludin Del Carro e Fregonese. (a.d.g.) – 23.12.2025
