Al è stât screât a Paulâr il puint metût a gnûf. L’intervent al è costât 1,79 milions di euros, finanziâts par 735 mil euros dal Plan complementâr dal Pnrr e par 1,055 milions de Regjon Friûl Vignesie Julie.
Tacâts tal Jugn dal 2025 e finîts tal Mai passât, i lavôrs a àn tornât a fâ su dut l’impalcât, a àn slargjât la cjarezade cun dôs corsiis di 2,75 metris e al è ancje stât fat un marcjepît. A son stâts conservâts, in acuardi cu la Sorintendence, la struture a arc e i elements architetonics origjinâi.
Intant che a lavin indenant i lavôrs dal cantîr, la viabilitât e jere stade garantide cuntun percors provisori lunc dal torin Cjarsò che cumò al restarà a disposizion dal Comun. “O tornin indaûr – e à confermât l’assessôr regjonâl aes Infrastruturis Cristina Amirante – sigurece e funzionalitât plene a une infrastruture fondamentâl pe val”. (a.d.g.) – 02.09.2026