Al podarès someâ strani, ma ancje il savalon al à aromai un ciert valôr, soredut se o pensìn ai ultins agns, che par cause dai cambiaments climatics e dal fat che il nivel des aghis si sta jevant sù, ancje lis nestris cuestis a patissin simpri di plui la erosion, tant che par salvâ lis splazis ogni an si scuen tirâlu sù dal mâr par tornâ a puartâlu sul litorâl, cuntune spese pluitost alte. E come che dispès al sucêt, l’om al cjate cualchi soluzion.
La societât Lignano Pineta e à di pôc finît il procès di recupar dal savalon tornât a doprâ su la splaze dopo jessi stât separât des alighis tiradis sù dilunc de stagjon balneâr dal an passât. Si trate di un model di economie circolâr che al à permetût di puartâ indaûr su la splaze cuasi 2.000 toneladis di savalon, che se di no a varessin vût di restâ in dipuesit tal implant, creant no pôcs problemis al gjestôr de plateforme.
“Lis alighis a son tiradis sù dilunc de stagjon balneâr ogni dì – al sotlinee il president di Lignano Pineta, Giorgio Ardito – in graciis dal lavôr dai colaboradôrs che a doprin mieçs mecanics e ristiei. Lis alighis dopo a son metudis intune aree dongje de splaze in spiete di jessi traspuartadis tal implant dal Pantanel a Lignan, gjestît de societât Adeco, indulà che si fâs la vandude par separâ il savalon. Il materiâl metût cussì in bande al ven tignût in areis a pueste fintremai ae fin dal Invier. Tacant di Març, dopo che e je stade finide la procedure autorizative, il savalon al pues jessi traspuartât di gnûf cun camions speciâi su la splaze e distirât doprant palis mecanichis, ancje chestis cuntune autorizazion speciâl”.
“Si trate di un esempli virtuôs di gjestion de splaze – al vise Ardito – che al dimostre cemût che l’impegn inte tutele dal ambient al puedi tradusisi in azions concretis, buinis di gjenerâ valôr e di tornâ indaûr al teritori une risorse preziose come il savalon. Chest intervent al fâs part de nestre filosofie aziendâl, di simpri atente ae sostignibilitât ambientâl e ae cualitât dai servizis”.
