A son plui di 2.400 lis firmis tiradis sù a pro de petizion popolâr inviade dal ““Comitato No Biometano a Pagnacco” cuintri dal progjet presentât di un consorzi di aziendis agriculis par fâ su un implant par produsi biometan tra lis frazions di Modolêt e Fontanebuine.
Il comitât al à ancje inmaneât, adun cul Codacons e cul grup di intervent juridic, un gnûf incuintri public su la cuistion, che al sarà miercus ai 3 di Setembar aes vot di sere intal oratori di Pagnà.
A son cetantis lis cuistions che a saran frontadis, tal particolâr lis ripercussions pussibilis dal implant su salût, trafic, odôrs e paisaç. A fevelaran il veterinari Michele Plozzer, il miedi Giuseppe Stinco, diretôr de cliniche dermatologjiche de Asufc, Francesco Curci, diretôr dal istitût di patologjie cliniche de Asufc, l’agronom Ezio Temporale e la storiche de art Gisella Fiorini. (a.d.g.) – 02.09.2025
