Pai dams dai cenglârs, che a pain lis risiervis di cjace

Dai dams causâts ae agriculture dai cenglârs simpri plui numerôs si discut di timp, ma de Confederazion taliane agriculture (Cia) e rive une propueste che dal sigûr a fasarà discuti: a sedin i diretôrs des Risiervis di cjace a rispuindi di chescj dams. “La invasion dai cjamps di bande de faune salvadie, cenglârs in particolâr, al è rivât a nivei intolerabii – al denunzie Luca Bulfone, diretôr di Cia Fvj – Agricultôrs Talians -. Lu vin ripetût ancje al assessôr regjonal aes Risorsis agroalimentârs e ae cjace, Stefano Zannier, dilunc dal incuintri sucedût a Udin, iundulà che a i jerin presints une desene di agricultôrs de Basse furlane (di Cjopris Viscon, Migjee, Frate, Borgnan, Aquilee), i rapresentants de Kmecka Sveza  e cualchi diretôr des Risiervis di cjace e dai Distrets venatoris competents par teritori. O vin formulât une domande precise: lis Risiervis, i Distrets venatoris e i lôr diretôrs, a àn di jessi clamâts ae direte responsabilitât pai dams che la faune salvadie a cumbine ae agriculture e ae sigurece publiche. I dirigjents venatoris, di fat – al va indevant Bulfone – no simpri a scoltin lis domandis di aiût dai agricultôrs che, in cualchi câs, a àn decidût fintremai di no semenâ la blave par vie de invasion dai salvadis”. Adg