Un grant plan di ricualificazion energjetiche al è la propueste che vuê il president di Confartigianato-Imprese Udine, Graziano Tilatti, al à consegnât al president de Regjon F-Vj, Massimiliano Fedriga, dilunc de cunvigne inmaneade de associazion di categorie inte sede dal Cafc, dedicât al cost tant alt de energjie, teme dal moment
Teme dificil, che se di une bande al domande intervents di emergjence, di chel altri al impon politichis di periodi medi, buines di progjetâ il doman. Di chi la sfide lançade dai artesans furlans al Governadôr: “Dopo cheste legjislature, vivude inte emergjence, tra Vaia, Covid, cjâr energjie e crisi economiche, o proponìn une legjislature di riscat, ae insegne de ricualificazion ambientâl di citâts, zonis industriâls e artesanâls, de rigjenerazion urbanistiche e de ricualificazion energjetiche di dut il patrimoni esistent. O podaressin fâ dal F-Vj – al à dit Tilatti indreçant un pinsîr a Ischie, al slac di Casamicciola e aes fameis colpidis dai corots – une regjon verde, smart, sigure dal pericul sismic e idrogjeologjic. Adun o podìn costruî une regjon ancjemò plui sigure indulà vivi e lavorâ. Nô – al à concludût Tilatti – o sin pronts a fâ la nestre part”.
“La Regjon e larà indevant a lavorâ – al à dit Fedriga – par rinfuarcî lis aleancis fra istituzions e citadins intal interès de comunitât regjonâl, inte cussience che e sedi cetant che mai necessari cjalâ cun fuarce al ûs di fonts rinovabilis e cjatâ, ancje intes inovazions in cjamp energjetic, gnovis fonts di energjie alternative. O scugnìn però vê la definizion di difindi i intervents necessaris, sielzint cun razionalitât, cence ideologjie e passant il partît dal no”. (ADG) – 28.11.2022
