Une volte finît, il gnûf parc fotovoltaic che a fasaran tai cjamps tra Pavie e S. Marie la Lungje al sarà il plui grant intal Nord Italie cui siei 93 etars, pâr a 130 cjamps di balon. Al sarà un implant bon di fâ cambiâ muse a un toc dal Friûl indulà che a son za stâts metûts jù altris centenârs di panei, come tal câs di S. Marie la Lungje indulà che al è za in vore un altri parc.
Il progjet promovût di Envalue Italia e MSE Solar Energy Italia al varà une capacitât di plui di 100 Mwp e al varès -a disin chei de aziende- di tirâ vie passe 90 mil toneladis di anidride carboniche dant energjie a plui di 75 mil fameis. Li dal parc e sarà fate sù ancje une grande stazion par ingrumâ corint tant che si pense di produsi plui di 210 Gwh par an che a varessin, simpri su la fonde di ce che al è scrit tal comunicât, di fâ sparagnâ 40 milions di metris cubis di gas une volte che al sarà in vore za tal 2026.
Plui di cualchidun, viodût ancje il progjet dongje Aquilee e ducj chei altris za fats, al tache a domandâsi se la robe no sedi scjampade di man a cui che al varès vût di vuidâ la gjestion dal teritori par no fânus deventâ un dipuesit di panei a cîl viert. (a.d.g.) – 11.12.2025
