Il ‘Punto di ascolto Antimobbing’ di Udin, che al e’ in vore in citât cul coordenament de associazion Educaforum, al à regjistrât tal 2024 une cressite fuarte des domandis di supuart.
Te scuadre di esperts di chest servizi promovût de Regjon, a lavorin une assegnade pal acet, un avocat, une psicolighe e un miedi dal lavôr che a puedin jessi contatâts in presince, cul telefon o ancje cun Wapp e Skype, cu la garanzie di riservatece e anonimât.
La assessore ae Paritât des oportunitâts Arianna Facchini e à dit che “O vin la fotografie dal utent che al clame par solit: si trate di feminis parsore dai 50 agns e che a àn un contrat a timp indeterminât tal setôr privât. A son feminis che a varessin problemis par lâ a vore di une altre bande e che forsit a àn problemis tal rivâ a stâ daûr a lavôr e famee.
La cressite di domandis di supuart e je costante e chest al podarès volê dî che plui int e cognòs il lavôr dal sportel, ancje in graciis de comunicazion fate cjapant dentri ancje i miedis di famee”. (a.d.g.) – 10.02.2025
