E je stade metude ju, a Luleå in Svezie, la prime piere dal gnûf implant vert fat de Danieli di Buri pal zigant dal açâl svedês SSAB. La cerimonie e je stade fate ae presince de vice presidente dal Guvier svedês e ministre de Industrie Ebba Busch e di une vore di rapresentants des istituzions locâls e dai cjâfs dai industriai.
Il progjet che al val plui o mancul un miliart di euros, al metarà su un dai implants plui avanzâts tal mont, cuntune capacitât produtive di 2,5 milions di toneladis ogni an di açâl speciâl e la riduzion dal 7% des emissions in Svezie, un travuart storic inte transizion energjetiche europeane.
“O sin onorâts che la vice presidente Busch e vedi definît chest progjet tant che il simbul di une gnove stagjon industriâl – al à sotlineât l’aministradôr delegât Giacomo Mareschi Danieli -. E je la conferme che la inovazion tecnologjiche taliane e je buine di gjenerâ beneficis ambientâi, economics e sociâi concrets, vuidant la transizion bande une açalarie cence carbon e competitive”. (a.d.g.) – 18.09.2025
