La metalmecaniche furlane e je in flession a pet dal 2023 e e sta tornant a posizionâsi sui marcjâts, ancje se cun cetancj dubis pal futûr. E je la fotografie fate dal rapuart dal Comet pal prin semestri dal 2024 che al regjistre un disfredament des esportazions, di simpri tiradis pal Friûl-Vignesie Julie de Gjermanie e dal Nord Europe.
Il 70% des impresis al previôt par chest an un faturât no plui alt dal an passât e chest pessimisim al è leât ae fuarte frenade daspò de cressite tal periodi dopo de pandemie.
L’Osservatori de metalmecaniche FVG al è un progjet fat e inmaneât dal Comet FVG che, cu lis Universitâts di Triest e dal Friûl, cun Intesa Sanpaolo e Area Science Park al met adun bancjis dâts diferentis par tignî controlât il setôr metalmecanic regjonâl. (a.d.g.) – 11.07.2024
