L’avignî digjitâl dal furlan al passe pe Europe

Un dai pôcs progjets selezionâts e finanziâts tal 2026 inte suaze de cooperazion transfrontaliere europeane Italie – Svuizare e je une iniziative che e cjape dentri la ARLeF – Agjenzie regjonâl pe lenghe furlane: “DIGI R-L-F”. Il progjet al ponte a promovi l’avignî digjitâl des trê lenghis minoritariis retoromanichis: il furlan in Friûl, il ladin in Sudtirôl e il rumanç tai Grisons. A cjâf de iniziative e je la Provincie Autonome di Bolzan. Dongje de ARLeF a partecipin la Lia Rumantscha – la associazion che e met adun lis organizazions linguistichis rumancis in Svuizare – Eurac Research e la Libare Universitât di Bolzan. Dal 2026 al 2028 a lavoraran adun par elaborâ une strategjie condividude tal setôr digjitâl. L’obietîf al è chel di creâ une rêt di competencis par infuartî la tecnologjie linguistiche e ufrî ae popolazion servizis digjitâi inovatîfs e facii di acedi. Il progjet al ponte a fâ sù un ecosisteme digjitâl condividût, in maniere di fâ fevelâ lis istituzions e i centris di ricercje un cun chel altri. La sfide e je dople: di une bande garantî la vitalitât des lenghis retoromanichis intun mont simpri plui globâl e digjitâl; di chê altre, infuartî – in maniere sostignibile l- a identitât culturâl des comunitâts, soredut lis gjenerazions plui zovinis, favorint une presince digjitâl plui ative. La iniziative e rapresente ancje une dimostrazion concrete dal valôr des colaborazions europeanis pes minorancis linguistichis. (A.I.) – 11.03.2026