Automatizâ une abitazion che e à un implant eletric tradizionâl cence fâ voris invasivis, al è pussibil. Darius Bughiu, Illan Lozia, Matteo Candusso e Davide Zamparo, students de classe 4EA – Setôr Eletric dal Centri di Formazion Professionâl Bearzi di Udin, lu àn contât intune video vuide bilengâl talian e furlan. Il filmât al è un imprest didatic che al funzione ben: al è stât creât dai arlêfs di vuê par che al resti a disposizion par chei di doman e si pues viodi inte pagjine dal progjet www.bearzi.it/smart-home
Propit pe sielte di realizâ un video in lenghe furlane, la ARLeF – Agjenzie regjonâl pe lenghe furlane e à volût ringraciâ i zovins cuntune targhe cul test “Pal impegn te promozion de lenghe furlane”. A àn consegnât il ricognossiment il president de Agjenzie, Eros Cisilino e il diretôr William Cisilino. I students a jerin compagnâts dal diretôr dal CFP Bearzi, Giulio Armano e dal lôr coordenadôr prof. Edoardo Berini.
Ai fantats e al lôr coordenadôr ur va il merit di vê volût fâ la version par furlan di un video tutorial che al spieghe cemût realizâ une smart home, ven a stâi une abitazion evolude là che dispositîfs tant che crics, lampadinis e termostats a interagjissin fra di lôr midiant di un protocol di comunicazion wireless. Chest sisteme al permet di slargjâ lis funzions dal implant tradizionâl e di scambiâ dâts ancje fûr di cjase in graciis de conession cu la rêt. Tal complimentâsi cui students, il president de ARLeF al à volût marcâ in particolâr cemût che “iniziativis come cheste a interpretin te maniere miôr il spirt che la Agjenzie e dopre tal sostignî e promovi l’ûs dal furlan. Une lenghe vive, buine di fevelâ ai zovins e di compagnâju intai procès di formazion e di cualificazion professionâl ancje intai setôrs des tecnologjiis inovativis”.
Al CFP Bearzi si lavore propit par jessi simpri al pas cul mont dal lavôr, cirint in mût costant gnovis strategjiis par cjapâ dentri i arlêfs. Come che al à marcât il coordenadôr Edoardo Berini “Il progjet “Smart Home” al nas de idee di fâur tocjâ cun man ai fantats lis tecnologjiis che vuê a caraterizin il marcjât. Un progjet pussibil graciis ae poie de associazion dai ex arlêfs e in colaborazion cu la ARLeF che e à fat in maniere di dâi une anime teritoriâl ae inovazion. Intal mont des instalazions eletrichis, il furlan al è une lenghe vive e tant doprade e il nestri obietîf al è chel di formâ professioniscj preparâts e cussients de lôr identitât”. (a.d.g.) – 24.03.2026
