Sospension de sieradure dal repart di vernisadure e scriture di un plan industriâl gnûf prime che a sedi cjapade cualsisei decision.
Chestis domandis a son stadis confermadis dai assessôrs regjonâi Sergio Emidio Bini e Alessia Rosolen, ae fin dal incuintri che a Udin al è stât cu la aziende, i sindicâts e la Confindustria. I doi esponents de Zonte regjonâl a àn daspò anunziât che e sarà inmaneade une taule lavôr par resonâ sul cemût protezi il lûc di produzion di Maian e i siei 27 puescj di lavôr.
L’obietîf al è chel di cjatâ soluzions condividudis e sostignibilis par tutelâ une marche storiche de industrie regjonâl, mantignint il lûc di produzion viert e i puescj di vore.
“La trasparence, la responsabilitât e une vision industriâl a son essenziâi,” a àn sotlineât Bini e Rosolen. “La Regjon e je pronte a fâ la sô part, ancje midiant di struments di politiche dal lavôr e dal intervent de Friulia, ma cualsisei supuart al à di jessi fondât suntun progjet credibil e suntun dialic reâl, che cumò al mancje”. (a.d.g.) – 09.01.2026
