“Cuant che si fevele di economie nô o sin presints, ma cuant che si cjatìn a fâ i conts cui nestris concorints internazionâi o partìn simpri svantazâts, e no di pôc, par vie de burocrazie, dal cost dal lavôr e di altris problemis. In dut câs o rivìn al travuart, tantis voltis fra i prins in graciis de capacitât di nô talians di cjatâ soluzions inovativis”.
Cun chestis peraulis la vicepresidente di Confindustria Udine, Anna Mareschi Danieli, e à viert, chest dopomisdì, a palaç Torriani, l’incuintri dal titul “In East (Europe) we trust” pensât par dâ aes impresis, in colaborazion cun Confindustria Russia e Confindustria Est Europa, un detaiât cuadri economic de situazion intal Est Europe, in mût di judâ oportunitâts e sinergjiis fra lis impresis dai nestris teritoris. Lis rapresentancis forestis di Confindustrie intal Est Europe a palaç Torriani a son une vore: Slovenie, Bosgne Erzegovine, Polonie, Macedonie dal Nord, Bulgarie, Ucraine, Bielorussie e Russie.
Cumò a lavorin in Russie passe 450 impresis talianis. I setôrs plui rapresentâts a son: manifature, agroalimentâr, oil & gas e energjie, mecaniche e machinaris, furniment e design, mode, chimiche e farmaceutiche, servizis aes impresis, par un faturât complessîf di passe 8 miliarts di euros. (A.I.) – 25.05.2022
