Jessi plui autonoms pe energjie eletriche par jessi plui competitîfs. L’esempli de Pmp

da Alessandro Di Giusto

“La Regjon e sosten lis industriis che a invistissin inte produzion energjetiche par autoconsum”, cun chestis peraulis l’assessôr regjonâl al Ambient e energjie Fabio Scoccimarro al à incitât Pmp Grup, intant de sô visite ae sede centrâl di Cosean, a lâ indevant intal so plan di invistiments par ridusi la dipendence energjetiche dal marcjât. A acetâlu al à cjatât il fondadôr e president di Pmp Grup Luigino Pozzo.

Pozzo al à fevelât dai invistiments impuartants in cors, 82 milions di euros in cinc agns, che a puartaran ae dopleade dai rigjâfs di un grup che cumò al conte 1.100 dipendents in vot implants intal mont, cuntun faturât di 150 milions di euros. Une fete impuartante dai invistiments il grup, leader mondiâl intes trasmissions inteligjentis par mieçs industriâi e agricui, al è daûr a destinle propit par ridusi i coscj de bolete eletriche. Di pôcs mês al è jentrât in funzion sui capanons un prin implant fotovoltaic di 1 Megawatt. Za programâts a son un implant di 500 Chilowatt su altris edificis, un di 1 Megawatt intal parc di spiete e un plui grant di 2 Megawatt inmò di fâ sui capanons previodûts pal ampliament. Terminât chest program di oparis Pmp Grup al podarà contâ su 4,5 Megawatt di potence di font rinovabile cence nissun consum di teritori.

“Il nestri obietîf – al à sclarît Pozzo – al è rivâ al 50% dai consums di fonts rinovabilis: lu fasarìn pal 30% cui nestris implants fotovoltaics e pal rest cun altris soluzions”. (ADG) – 21.09.2022

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui