Inter-Rail, la societât furlane di logjistiche, si è adiudicade il bant de Regjon a poie dal traspuart feroviari di bramme – semilavorâts di açâl destinâts ae laminazion di lamarins – dal puart di Monfalcon ae zone industriâl Ausse-Cuar e a ducj i siei laminadôrs, che al à permetût intal ultin an di gjavâ 39 mil camions des stradis e duncje di ridusi une vore il trafic, l’incuinament e il pericul di incidents.
Al è un ricognossiment impuartant pe societât di logjistiche controlade cun cuotis compagnis de Fantoni e de Abs, che e organize e e disvilupe traspuarts feroviaris sedi pes aziendis sociis (40% dai volums) sedi par clients tierçs.
Une prime sperimentazion di chest servizi e jere sucedude al principi dai agns 2000 di bande di chel che al jere il Consorzi Ziac e une seconde dal 2018 di bande de Regjon che, viodûts i risultâts di sodisfazions, e à volût fâlu deventâ struturâl. La aministrazion regjonâl duncje e à inviât une procedure di selezion dal operadôr, adiudicade apont a Inter-Rail, che e je daûr a fâ 10 trens par setemane par une capacitât di 1.600 toneladis/tren di semilavorâts metalics che a disbarcjin inte stazion dal Lusinç.
Sodisfazion e je stade esprimude dal president Tullio Bratta e dal aministradôr delegât Mirta Fior.
“Vuê cualsisedi ativitât industriâl par jessi competitive e à di jessi ancje sostignibile – al à comentât Bratta – cun chest nestri impegn infuartît intal traspuart vert o volìn judâ un disvilup economic che al ledi a benefici e no in contrast cu lis comunitâts locâls”. (A.D.G.) – 24.03.2023
