Ancje Udin al regjistre il progressîf sbassament des buteghis. Daûr dai dâts dal Osservatori su la demografie di imprese intes citâts talianis di Confccommercio (la fotografie sul 2023 e je inzornade a Jugn), dal 2012 al 2023 il câl al è dal 20% intal cumierç al detai tal centri storic (di 564 a 448 impresis) e dal 15% inte aree no centrâl (di 403 a 343). L’impat de crisi al è mancul impuartant su albiercs, bar e ristorants: tal centri storic si passe di 358 a 343 (mancul 4%), intant che fûr dal centri a cressin di 235 a 244 (plui 4%).
Fasint un confront tra il 2019 e il 2023, i agns dal Covid e dal post Covid, la tindince al ribàs e je palese sul cumierç, che al regjistre 50 impresis in mancul tal centri storic e 12 fûr dal centri, intant che su esercizis publics e ricetivitât o sin a mancul 30 ativitâts in centri e a mancul 14 in perifarie.
“Lis dificoltâts dal terziari, che al reste par altri setôr centrâl inte economie citadine, se o pensìn ai passe 11.500 lavoradôrs a Udin intal cumierç e inte ospitalitât – al è il coment dal vicepresident talian di Confcommercio e provinciâl di Udin Giovanni Da Pozzo -, a saltin fûr cuant che e mancje une programazion urbanistiche che e sedi coerente cu lis dimensions de citât. La simpri plui consolidade abitudin ai acuiscj in linie e à cressût cence dubi in cierts setôrs la desertificazion, ma no dismenteìn ancje il pês des incombencis burocratichis e i coscj insostignibii de fiscalitât sedi taliane che locâl”. (a.d.g.) – 08.02.2024
