Une imprese di Udin e je al centri des investigazions fatis de Vuardie di Finance pe fraude leade al Superbonus 110%. La aziende e varès metût in pîts un plan par otignî i credits di impueste e lis caparis di cetancj clients par lavôrs che dispès no son stâts fats.
I financîrs cu la operazion “Ghost works” (lavôrs fantasimis), coordenade de Procure di Udin, a àn denunziât i titulârs di une imprese edîl par fraude ingriviade ai dams dal Stât, daspò vê tirât sù caparis par plui o mancul 5 milions di euros di plui di 550 clients e par vê gjenerât credits di impueste che no esistevin. Te fraude a son cjapâts dentri, di là dai titulârs de imprese, un comercialist e un inzegnîr che a varessin documentât lavôrs mai fats o dome tacâts e mai puartâts ae fin. In cuatri a son stâts cussì denunziâts par falsetât ideologjiche, fraude par cjapâ bêçs publics e par vê fat faturis su operazions che no esistevin.
Ae fin des investigazions, il Tribunâl di Udin al à ancje decidût la viertidure de licuidazion judiziâl de societât, che i siei aministradôrs a son ancje stâts denunziâts par bancjerote cun fraude e il ricors abusîf al credit. (a.d.g.) – 10.10.2025
