Sîs aministradôrs di trê societâts di Pordenon a son stâts denunziâts de Vuardi di finance di Pordenon dopo che a vevin rivât a cjapâ in maniere ilecite 10 milions di euros di contribûts publics dedicâts ae eficience energjetiche.
Lis investigazions a àn mostrat che i indagâts a vevin otignût e negoziât plui di 50 mil certificâts blancs che a certificavin il sparagn energjetic. Chescj certificâts dal valôr di plui di dîs milions di euros a saressin stâts domandâts par 292 progjets di eficientament mai fats o che par chei lis societâts no vevin dât nissun supuart.
Dute la operazion e jere stade metude in pins di une societât di Pordenon cence struturis e dipendents cu la complicitât di altris dôs impresis, une che e vendeve materiâl termoidraulic e che altre impegnade te distribuzion di panei solârs. Chestis dôs societâts a vevin dât i nons di clients che a vevin fat lavôrs par sparagnâ energjie ma che no vevin domandât lis detrazions fiscâl. (a.d.g.) – 23.06.2025
