Il sisteme economic cooperatîf dal Friûl-Vignesie Julie al ten dûr, ancje se a son tantis dificoltâts. Al è chel che al ven fûr dai dâts dal Belanç sociâl 2021 di Legacoop F-Vj. Lu àn dite, a Palme ai 12 di Dicembar, i sorestants de associazion che, cui siei cuasi 210 mil socis e un valôr de produzion di 1,21 miliarts di euros, al rapresente un osservatori favorît sul moviment cooperatîf e sul andament economic dal teritori.
“In gjenerâl, i associâts, cundut di un an tant dûr par vie de pandemie e dai prins segnâi di aument de inflazion, a tegnin o a van miôr dal 2020. La bontât dal lavôr e dai risultâts otignûts al è testemoneât dal aument dal patrimoni net, che al segne un plui 18 milions a fin 2021”, al à comentât il president di Legacoop F-Vj, Livio Nanino, dopo i salûts dal sindic di Palme, Giuseppe Tellini, e la ilustrazion dai dâts di Marco Caputo di Isfid Prisma.
Il patrimoni net complessîf des cooperativis associadis a Legacoop F-Vj al rive a 218 milions di euros. La associazion e ten dongje lis cooperativis plui grandis de regjon che, di bessolis, a implein plui di 16 mil lavoradôrs. Grandis e che a lavorin di tant timp, viodût che des 170 cooperativis e impresis associadis, 21 a àn plui di 50 agns di vite e ben 7 a àn passât il travuart dai 100 agns di ativitât.
La presentazion dal Belanç sociâl, cun di plui, e je stade ancje la ocasion par fevelâ des oportunitâts ufiertis des Comunitâts energjetichis rinovabilis (Cer), tant che soluzion ae energjie cjare e ae sostignibilitât ambientâl. A fevelâ a son stâts il diretôr di Legacoop F-Vj, Alessio Di Dio, il responsabil dal ufici Energia&Ambiente di Legacoop nazionâl, Giorgio Nanni, il diretôr de cooperative Part-Energy, Matteo Ghiotto e il president di Anci F-Vj, Dorino Favot. In regjon e je operative a Udin “Part-Energy”, prime e uniche cooperative regjonâl che e promôf lis Cer. “Lis Comunitâts energjetichis – al à dit Di Dio – a son simpri plui impuartants in graciis des ultimis normativis, ma a coventin ancjemò dai decrets atuatîfs. Intant, par no cjatâsi impreparâts, al è ben scomençâ daurman il percors di costituzion e cognossi il lôr funzionament”. (ADG) – 13.12.2022
