E je pardabon impuartante la decision de Cort costituzionâl che, ai 16 di Lui, e à declarât che e je legjitime la improibizion di meti jù panei fotovoltaics direts a tiere intes areis agriculis.
Pe Cort, il legjislatôr al à in maniere legjitime curât l’interès public par evitâ il consum di teren agricul e par tutelâ la sô funzion produtive cence comprometi dal dut il disvilup des energjiis rinovabilis. Chest al vûl dî che la improibizion no à a ce fâ cundut il fotovoltaic in agriculture, ma dome chei implants indulà che il panel al è poiât a tiere cussì dongje dal teren che nol permet la sô coltivazion. La transizion energjetiche e reste un obietîf prioritari, a scrivin i judiçs, ma e à di jessi belançade cun chei altris interès costituzionâi, tant che la tutele dal paisaç, dal ambient e de agriculture. Propit par chest la Cort costituzionâl e considere resonevul il fat di favorî l’agrivoltaic a pet dai implants tradizionâi a tiere. Cjale il câs, al è propit il gjenar di implants metûts jù in maiorance ancje in Friûl, taponant etars di cjamps indulà che al à za un miracul se si rive a seâ la jerbe.
“La sentence de Cort costituzionâl – a fasin savê de Agjenzie pe energjie dal Friûl-Vignesie Julie – e conferme ce che o vin simpri dit, compagnant i nestris Comuns tal percors bande di une transizion energjetiche juste e rispietose dai teritoris e des comunitâts, cul obietîf di fâ cressi la energjie rinovabile ma no a ducj i coscj come che invezit al è sucedût tai ultins agns chi di nô”. (a.d.g.) – 07.08.2026
