“O acetìn cun favôr la disponibilitât e l’interès di Roncadin a puartâ ancjemò risorsis impuartantis in Friûl-Vignesie Julie cu la prospetive di slargjâ ancjemò di plui la produzion e fâ cressi i puescj di vore. L’incuintri di vuê al è servît par capî lis esigjencis de aziende e discuti dal plan di disvilup. De bande de Regjon e je simpri la atenzion massime pes impresis virtuosis che a rapresentin une marche di ecelence e un veicul di promozion dal nestri teritori e dai siei prodots in Italie e intal mont. A son diviers i struments che la Regjon e pues meti in cjamp par sostignî i invistiments privâts, soredut se smirâts ae riconversion di sîts e capanons dismetûts. Za intal passât resint o vin dimostrât la concretece de nestre poie al tiessût industriâl locâl”.
Al è il coment dal assessôr regjonâl aes Ativitâts produtivis e Turisim Sergio Emidio Bini a margjin de visite al implant di Midun de Roncadin spa. (a.d.g.) – 26.02.2024
