I Cavalîrs dal lavôr si dan adun ae Fazioli

Si daran adun martars ai 21 inte fabriche di pianos Fazioli di Sacîl i Cavalîrs dal lavôr dal Grup “Triveneto”. La Federazion Nazionâl e da adun i miôr imprenditôrs talians e e je puartadore di valôrs e visions buinis di dâ un contribût significatîf al dibatiment politic e economic dal Paîs. La sô mission e je chê di meti la ecelence imprenditoriâl al servizi de cressite, dal avignî e de inovazion dai teritoris e dai talents zovins. La delegazion vuidade di Enrico Zobele e sarà ospit di Paolo Fazioli, nomenât Cavalîr dal Lavôr dal President de Republiche, Sergio Mattarella, intal 2016. E sarà la ocasion, pai imprenditôrs dal grup, di visitâ la fabriche dulà che di plui di cuarante agns in ca a vegnin creâts i pianos a code e di conciert Fazioli, ricercjâts simpri plui di artiscj, teatris e scuelis preseadis in dut il mont. (A.I.) – 20.03.2023