La Cgil dal Friûl-Vignesie Julie e à sielt il sucessôr di Villiam Pezzetta. Al è Michele Piga, elet vuê a Tresesin de assemblee gjenerâl, clamade inte sale congrès dal albierc Belvedere in presince dal segretari de Cgil taliane, Maurizio Landini. Triestin classe 1974, Piga al è segretari gjenerâl de Cjamare dal lavôr juliane, che al vuide dal 2016, e al è jentrât inte segretarie regjonâl cul ultin congrès, che si è tignût intal Fevrâr dal 2023.
Elet a largje maiorance, Piga al veve presentât ae assemblee il so program, leât a une analisi critiche dai senaris industriâi e dal cuadri politic sociâl. Negatîf il judizi sul operât dal Guvier Meloni, des politichis industriâls a chês pal lavôr, penalizât de difusion de precarietât e dai salaris bas, dal fisc aes politichis sociosanitaris. “La flat tax, la riduzion des alicuotis Irpef, i condons – al à dit Piga dal palc dal albierc Belvedere – a segnin tais plui profonts te societât, cressint lis disavualancis. Chestis misuris a segnin a clâr a cuâi segments de popolazion chest Guvier al fâs riferiment. E pûr di sostignî chest intervent sul fisc, il Guvier al à sielt in sostance dôs stradis. Di une bande chê “vindicative” cuintri i puars e chei plui fragjii, gjavant il redit di citadinance intune fase là che a cressin lis puaretâts e il discomut, di chê altre il tai de spese sociâl e sanitarie”. (a.d.g.) – 25.01.2024
