“Il gnûf Codiç regjonâl dal cumierç e dal turisim – al à sotlineât l’assessôr regjonâl aes Ativitâts produtivis e al Turisim Sergio Emidio Bini daspò de aprovazion dal document in vie preliminâr fate vuê de Zonte regjonâl – al è il prin a cjapâ dentri in Italie ducj i doi chescj setôrs, intune otiche di promozion integrade dal teritori. Daspò de presentazion des liniis vuide e dal confront cu lis categoriis, il test de leç al è stât insiorât ancjemò cu la riforme de urbanistiche comerciâl, il sostegn ae cualitât dal lavôr e la modifiche de normative regjonâl su la impueste turistiche. O ringracii lis organizazions sindicâls e lis associazions di categorie par vê colaborât in maniere significative tal introdusi chestis e altris novitâts che a judaran a rivoluzionâ la regolamentazion dal terziari inte nestre regjon”.
Positive la reazion de Confcommercio: “La propueste di leç e va inte direzion juste, chê de semplificazion e dal ricognossiment de impuartance e centralitât dal terziari”. (a.d.g.) – 04.09.2025
