Al va indenant il rinovament des Termis di Grau, in graciis dal secont lot dai lavôrs inviât tal Setembar dal 2024. Cuntun invistiment di 4,5 milions di euros, a saran viertis une aree pe salût (fitness), une pe bielece (beauty) e une terace esterne.
Des novitâts si è fevelât vuê dilunc de presentazion de stagjon 2025 ae presince dal assessôr regjonâl al Turisim Sergio Emidio Bini, dal sindic di Grau, Giuseppe Corbatto, e dal president de Grado Impianti Turistici (Git), Roberto Marin.
L’intervent al fâs part de cressite de ufierte turistiche de Isule dal Soreli, sostignude des campagnis di promozion talianis e tal forest, voludis de Regjon.
La stagjon si mostre buine in graciis dal fat che i presits su la splaze no saran aumentâts, ae cressite des prenotazions dal forest e al miorament de sigurece. (a.d.g.) – 03.02.2025
