Gallas Group tra lis Pmi che a cressin di plui in Italie

A son 800 lis Pmi talianis che l’Istitût Todesc di cualitât e finance al à certificât tant che lis piçulis e mediis impresis che a son cressudis di plui intal faturât intal ultin tre agns. Fra chestis, un rûl di prin plan lu à vuadagnât la Gallas Group, la aziende dal setôr de assistence domiciliâr midiant colf e badantis che, partide dîs agns indaûr di Udin, si è espandude in dut il centri Nord e vuê e conte une trentine di filiâls in zîr pe Italie.
“Al è  simpri di sodisfazion viodi il propri lavôr valorizât, e cheste classifiche nus dà une idee de bontât dal nestri operât. A son 10 agns – al à dit sodisfat Alberto Gallas titulâr, intune cul fradi Lorenzo, de aziende udinese  – che o stin lavorant ogni dì in mût intens e cuant che tu ti impegns e tu fasis sacrificis i risultâts ae fin a rivin simpri”. La espansion dai ultins mês fin in Toscane e la cuviertidure aromai di vot regjons a fasin di Gallas Group une des realtâts principâls intal setôr de assistence in Italie. (ADG) – 14.11.2022