Dopo trentesiet edizions Aiar di Fieste, la manifestazion che dal 1985 al 2023 e à celebrât il leam che al unìs il Persut di S. Denêl Dop al so teritori di origjin, si congjede dal public. L’avigniment al è stât organizât fint dal principi dal Consorzi in colaborazion cul Comun e la Pro S. Denêl, partners e sostignidôrs de manifestazion, che le àn calcolade di simpri un strument zovevul ancje pe promozion de citât. Aiar di Fieste e à contribuît a tornâ a vitalizâ e a rilançâ il centri storic dal paîs, dopo la ricostruzion laboriose dopo il taramot dal 1976, aumentant la notorietât dal teritori in graciis di une valence significative turistiche e gastronomiche cu la presince dal Persut di S. Denêl. Il disvilup turistic, economic e sociâl di S. Denêl al è leât a strent al persut e, di fat, il Consorzi ancje traviers Aiar di Fieste e à favorît la promozion e il disvilup turistic de citât, organizant un avigniment che al à atrat visitadôrs sedi de Italie che dal forest.
“Vuê si pues in maniere obietive afermâ – si lei intal comunicât dal Consorzi – che cuasi ducj i dîs dal an a S. Denêl al sedi ‘aiar di fieste’, considerazion testemoneade dal fat che lis ativitâts leadis ae cerce dal persut, ae ristorazion e al acet turistic a son in cressite e a àn aromai une lôr posizion e status stabii. Chestis evidencis a àn puartât il Consorzi a ritignî che Aiar di Fieste e vedi completât il so cicli e fat in maniere utile la sô funzion”. (a.d.g.) – 09.02.2024
