I scarts organics a deventin energjie. A Udin il biodigjestôr che al trasforme i refudums organics in biometan al à scomençât a funzionâ in mût uficiâl: vuê, lis primis dîs toneladis di refudums a son stadis consegnadis tai implants de Net di vie Gonars, segnant l’inizi dal cicli operatîf.
Cun la jentrade in funzion dal biodigjestôr, al è stât creât un sisteme tecnologjic avanzât, unic intal Friûl – Vignesie Julie, che al permet il pretratement dai refudums organics e daspò la produzion di biogas e biometan. Il procès al è dal dut automatic: i refudums a son separâts, tratâts e mandâts pe digjestion anaerobiche, ridusint lis emissions di CO2 e miorant la cualitât dal compost.
Cuant che e sarà dal dut operatîf, l’implant al sarà bon di produsi avonde energjie rinovabile par rispuindi ai dibisugns di plui o mancul 12.000 citadins. “I refudums biologjics a deventin une risorse concrete pal teritori – e à sotlineât Eleonora Meloni, Assessore pe Sostignibilitât ambientâl -dimostrant che la economie circolâr e la inovazion a puedin tradusisi in beneficis ambientâi reâi”. (a.d.g.) – 26.01.2026
