Intal prin semestri 2022 il numar medi di lavoradôrs stimât dal Istat in Friûl Vignesie Julie al è di cuasi 527 mil unitâts, 26 mil in plui a pet dal stes periodi dal an passât (plui 5,2%), cuant che la economie e jere ancjemò condizionade in maniere negative des restrizions par frontâ la pandemie.
Ancje intal confront cui prins mês dal 2019, prime de emergjence Covid, si rileve une cressite impuartante (plui 22.700 unitâts). Lu fâs savê il ricercjadôr de Ires Alessandri Russo che al à rielaborât dâts Istat.
La riprese de ocupazion in cheste fase di superament de crisi sanitarie e à rivuardât in maniere esclusive il lavôr dipendent (plui 25.500 unitâts su base tendenziâl), intant che chel autonom al è restât stabil. I setôrs che a àn contribuît positivementri a son: la industrie (plui 8.200 assumûts a pet de medie dal prin semestri 2021), cumierç, albiercs e ristorants (plui 6.600), altris ativitâts dai servizis (plui 11.200). (ADG) – 14.09.2022
