E je fuarte preocupazion tra lis impresis artesanis dal Friûl pes consecuencis provocadis dai dazis imponûts dai Stâts Unîts: “Lis piçulis impresis des provinciis furlanis – al à dit Graziano Tilatti, president di Confartigianato Imprese Udine – a son chês plui batudis. Par chest al covente che la Union Europeane e intervegni pensant no dome aes aziendis grandis, ma ancje a dute la rêt de sub furnidure”.
Tilatti al à visât su la impuartance di jutori a dutis lis filieris di setôr, su la fonde dai studis fats dal ufici di Confartigianato taliane: “Viodût che il 84,5% des esportazions bande dai Usa al è fat di aziendis mediis e grandis – l’impat dai dazis si trasmet al sisteme des impresis piçulis dilunc des filieris. Inte manifature, il 44,4% des impresis micro a àn rapuarts cun altris tant che sub furnidôrs, cuote che e va su al 51% pes impresis che a àn dai 10 ai 49 assegnâts”. (a.d.g.) – 30.07.2025
