“Lis peraulis dal president de Repubbliche Sergio Mattarella sui contrats piratis a confermis l’alarme par une situazion che Confcommercio e denunzie di timp, ven a stai chel di un fenomen che al ruvine la cualitât dal lavôr e la concorence leâl tra lis impresis”. Lu à sotlineât Giovanni Da Pozzo, vicepresident talian di Confcommercio e president di Confcommercio Udine, tal comentâ l’intervent dal Cjâf dal Stât inte suaze de de cerimonie di consegne des Stelis al merit dal lavôr.
Da Pozzo al à visat che pocjis setemanis indaûr Confcommercio e veve dât fûr une analisi fate a nivel talian che e mostrave la jungle di contrats coletîfs in Italie: plui di mil dipuesitats tal Cnel, di chei plui di 250 fats nome tai setôrs dal terziari e dal turisim: “A flanc di pôcs contrats che a son par da bon rapresentatîfs – al à dit Da Pozzo – a son plui di 200 contrats piratis firmâts di siglis minoritariis che a cjapin dentri 160 mil lavoradôrs e 21 mil impresis. Si trate di une forme di concorence sleâl che e ridûs i dirits e lis tutelis, e sbasse i salaris e al fas dams aes impresis coretis”. (a.d.g.) – 17.10.2025
