E je tacade ancje a Remanzâs la racuelte di firmis cuintri dal paiament pes aghis di ploie domandât dal consorzi di bonifiche plan furlan, che e pese su fameis e ativitâts.
La racuelte di firmis pe petizion bande dal president dal Consei regjonâl, indulà che si domande la revision dal gnûf plan di classificazion dal Consorzi che al previôt paiaments ancje par cui che nol à nissun benefici diret dai servizis, e je stade promovude e inmaneade di un grup di citadins come za fat dai comitâts spontanis a Buie, Trep Grant e Colorêt di Montalban. “O domandin che il metisi adun dai citadins e des istituzions al puedi judâ intal fâ sintî lis nestris resons – a àn dit intune note i organizadôrs de petizion -. Par chest o invidin ducj i citadins a firmâ cheste petizion”.
Si pues firmâ tal Fer Market in place Diacono intai oraris di viertidure. (a.d.g.) – 19.05.2025
