Cuasi il 10 par cent in plui di presincis a Grau intal 2023

da Alessandro Di Giusto

“O stin cjapant i risultâts dai grancj invistiments economics e progjetuâi fats de Zonte in chescj agns pal turisim e la promozion dal teritori: lu dimostre il fat che intal 2023 o vin passât lis 10 milions di presincis turistichis in regjon. In chest contest, Grau al à un rûl di impuartance primarie, regjistrant dibessole plui di 1 milion e 427 mil presincis intal an a pene concludût (plui 9,4% a pet dal 2022). A son dâts significatîfs, che a segnin cemût che lis nestris localitâts balneârs a van indevant cun sucès dilunc la strade de destagjonalizazion e nus permetin di cjalâ al futûr cun otimisim”. Lu à dit vuê a Grau l’assessôr regjonâl al Turisim Sergio Emidio Bini intal cors de conference stampe organizade di Grado impianti turistici (Git), là che a son stâts presentâts i servizis e lis ativitâts in program in viste de stagjon estive prossime. Ae presince, tra chei altris, dal president di Git Grado Roberto Marin e dal comissari dal Comun di Grau Augusto Viola, il rapresentant dal Esecutîf al à metût in evidence i numars positîfs regjistrâts inte Isule dal soreli intal 2023. Dome pal periodi estîf (Mai-Setembar), Grau al à fat regjistrâ un aument des presincis dal 6,1% a pet dal stes periodi dal 2022. Ma la prestazion e je stade otime dilunc dut l’an e par cierts viers ancjemò miôr intai periodis extra estîfs, tant di rivâ a un complessîf plui 9,4% di presincis. (a.d.g.) – 01.02.2024

Lasse un coment

Redazion

logo

Editoriale Il Friuli Srl
P.IVA 01907840308

Regjistrazion al Tribunâl di Udin n. 9

dai 6 di Lui dal 2022

PRIN PLAN

Chest sît al dopre i cookies par miorâ la tô esperience di navigazion. Lant indevant tu acetis la nestre informative su la privacy. Acetâ Lei di plui