A son stâts 1.348 i citadins dal Friûl – Vignesie Julie che tal 2025 e àn domandât jutori al Corecom, Comitât regjonâl pes Comunicazions par meti a puest controversiis cu lis compagniis dal telefon, che a dan il servizi internet o di Pay tv. In 833 cas, i citadins a àn vude reson.
Al è il dât forsit plui impuartant mostrat dal president di Corecom, Mario Trampus, inte sô relazion anuâl al ufici di presidence dal Consei Regjonâl.
“Ben 817 udiencis su 820, passe il 99 par cent -al à visat Trampus – a son stadis convocadis dentri di 30 dîs de presentazion de istance, une vore miôr dai obietîfs fissâts de Agcom”.
De relazion di Trampus al salte fûr che “lis controversiis plui numerosis a àn a ce fa cu la faturazion e spesis par servizi no domandâts, pal rispiet mancjât dal contrat, pai ritarts intal inviâ i servizis, pes penâls aplicadis in maniere pôc clare e par contrats firmâts di altris personis cence che il citadin nol savès nuie”. (a.d.g.) – 04.05.2026
