Un contribût di 300 euros par ogni proprietari par ridusi la puartade de erogazion dal so poç artesian. La Regjon midiant l’assessôr regjonal al Ambient Fabio Scoccimarro e à presentât la ordenance ai sindics che cun chê e invide i citadins a intervignî.
Presint ancje il president dal Consei regjionâl Mauro Bordin, che al à augurât la condivision massime e la colaborazion cui sindics suntun argoment sensibil che al à une valence storiche-culturâl in plui che ambientâl. Bordin al à preseât la condivision dal fin cui sindics e la volontât di lâ daûr di un percors di jutori ancje economic a pro des fameis. La Regjon e à in cors aprofondiments e azions che a rivuardin ancje l’ûs industriâl, no ultime la ipotesi di fâ un acuedot duâl. Critichis ae ordenance a son rivadis di Andrea Dri, prin citadin di Porpêt, che al à visât che nol vûl puartâ indenant la difese egoistiche di une particolaritât teritoriâl, ma che la ordenance e presente difiets di caratar juridic che a podaressin blocâle. (a.d.g.) – 06.09.23
