Cuntun faturât stabil parsore dai 113 milions di euros, un util net di 1,3 milions e il setôr finanziari in rinfuarciment a son une vore positîfs i numars dal belanç dal 2025 aprovât de assemblee dal Consorzi Agrari Fvg che al conferme la soliditât e la capacitât di adatament intun contest economic ancjemò complicât.
L’indebitament in bancje al continue a ridusisi a testemoneance de gjestion une vore atente e prudent. Tal stes timp il Consorzi al va indenant tal procès di rinovament ancje dal pont di viste organizatîf: ae fin dal an passât i dipendents a jerin 189, cuntune etât medie di 41 agns, numar che al mostre il fat che si trati di une struture dinamiche che e cjale bande dal futûr. Il cjapitul dai invistiments tal 2025 al à superât i trê milions di euros. (a.d.g.) – 30.04.2026
