La Vuardie di finance le à clamade operazion “Ghost factory”, ven a stai fabriche fantasime, parcè che no si saveve nuie di je in graciis dal fat che tal capanon ducj i barcons a jerin stâts taponâts e la energjie eletriche e jere prodote cuntun gjeneradôr.
Tal capanon di Gonârs di passe 2.165 metris cuadris dut câs si produseve passe un milion di spagnolets mandâts fûr pronts in pachets e stechis cu lis marchis Marlboro Gold, Marlboro Rosse e LM che dopo a vignivin puartâts tal nord Europe, indulà che i presits a son une vore plui alts di chei talians. A Remanzâs al jere invezit il dipuesit indulà che i spagnolets a jerin cjamâts sui camions e puartats vie.
I oms dal grup investigatîf criminalitât organizade (Gico) di Triest dal Servizi centrâl investigazion criminalitât organizade (Scico) e ancje dal Comant de Vuardie di finance di Udin a àn lavorat par une vore di timp prime di jentrâ in azion, ancje parcè che i implants a jerin ducj controlâts di telecjamaris, ma ae fin e je saltade fûr forsit la plui grande fabriche clandestine di spagnolets mai cjatade in Friûl, cun dentri implants pe produzion une vore modernis.
Dentri de fabriche a son stâts cjatâts 21 oms a vore, di nazionalitât ucraine e moldave, cence permès che a scugnivin durmî dentri de fabriche.
Si pense che la fabriche e fos in vore di cinc mês e che a vedi produsût plui di 137 milions di spagnolets cuntun zîr di bêçs di passe 89 milions di euros. Secuestradis passe 77 toneladis di spagnolets e tabac, il gjeneradôr regalât ae Protezion civîl e i machinaris. (a.d.g.) – 09.04.2026
