Belanç in cressite pe cooperative Hattiva Lab di Udin

Hattiva Lab, cooperative sociâl di Udin, e à sierât l’an passât regjistrant une cressite in ducj i setôrs: economic, ocupazionâl, sociâl e organizatîf. Il belanç si è sierât cun plui di doi milions di valôr de produzion e l’util che al è cuasi dopleât: “Chest al è il risultât – e à dit Paola Benini, presidente de cooperative – di une gjestion atente e sostignibile, buine di meti dongje eficience economiche e cualitât dai servizis”.

Il setôr plui impuartant al reste chel de disabilitât cun plui di 690 mil euros di valôr produsût, intant che il setôr dai minôrs si manten stabil e al tocje i 572 mil euros. Plui che dopleât in doi agns il setôr de inclusion lavorative. (a.d.g.) – 03.07.2025