La straçarie alimentâr e je un probleme ben presint intal nestri Paîs, ancje se i dâts relatîfs al 2023 a segnalin une marcjade riduzion dal fenomen, compliç l’aument dai presits causâts de inflazion. Part dal merit al va ancje aes aziendis plui virtuosis che a àn ativât politichis concretis par rimeti in circul i aliments. Al è il câs de Aspiag Service, concessionarie dai marcjis Despar, Eurospar e Interspar pal Trivenit, la Emilie-Romagne e la Lombardie, che e je lade indevant a contrastâ la straçarie alimentâr, cumbinant cun sucès i principis de sostignibilitât ambientâl cun chei de assistence aes personis in situazions di dificoltât. L’impegn de aziende al à puartât, di fat, al recupar di cuantitâts impuartantis di mangjative no vendude, che a son stadis distribuidis dopo a chei che a àn plui bisugn, traviers une rêt solide di associazions e organizazions benefichis intes regjons là che la aziende e opere.
Intal specific, a son stadis cjapadis sù 385 toneladis di prodots alimentârs no vendûts intai ponts vendite a gjestion direte dal Friûl-Vignesie Julie. Chescj prodots a son stâts rimetûts in circul, permetint la preparazion di plui di 850 mil pascj destinâts a chei che si cjatin in situazions di plui dibisugne.
La iniziative e je part di un progjet che la aziende e puarte indenant in ducj i teritoris là che e je presinte e che al à permetût di rivâ a travuarts impuartants: nome intal 2023 intes cinc regjons là che e je operative, Despar (Aspiag Service) e à recuperât mangjative di diviersis tipologjiis di prodots par un totâl di 1.460 toneladis che a àn permetût di fâ plui di 3 milions di pascj. La iniziative e à cjapât ducj i ponts vendite direts de marcje dal Peç in Venit, Emilie-Romagne, Friûl-Vignesie Julie e Trentin-Sudtirôl, traviers il cubiament des buteghis cun almancul une associazion di riferiment che, cun cadence regolâr, e à cjapât e redistribuît i prodots ancjemò comestibii, ma no plui idonis ae comercializazion.
Inte nestre regjon la cuantitât complessive di marcjanzie recuperade e à prodot un sbassament dai refudums aziendâi di 370 toneladis, che a ecuivalin a plui di 822 scovaçons. Cun di plui, la iniziative e à evitât la straçarie di plui di 1 milion di toneladis di emissions di Co2 e cuasi 800 mil metris cubis di aghe, ecuivalent di plui o mancul 250 pissinis olimpichis, doprade pe produzion dai aliments ripuartâts in circul.
“Il nestri impegn cuintri la straçarie alimentâr in Friûl-Vignesie Julie al continue a segnâ progrès significatîfs – al aferme Fabrizio Cicero, diretôr regjonâl Despar (Aspiag Service) pal Friûl-Vignesie Julie -. La sinergjie cun Banco Alimentare, Last Minute Market e lis associazions di volontariât no si limite dome a contribuî in maniere significative ae riduzion des straçariis alimentârs, ma e sta ancje tiessint leams simpri plui solits cu lis comunitâts là che o operìn”. (a.d.g.) – 06.02.2024
