Asîi in dificoltât par vie de energjie simpri plui cjare

A tornin a vierzi i asîi, ma intal setôr si fasin i conts cui auments dai coscj energjetics. “A je cetante preocupazion fra lis cooperativis impegnadis intai servizis ae infanzie, massime cul svicinâsi dai mês invernâi, cuant che i coscj dal riscjaldament a saran alts e a pesaran i auments di presit – l’Invier passât lis boletis energjetichis a jerin stadis tant superiôrs ai agns normâi”, al conferme Luca Fontana, president regjonâl di Confcooperative Federsolidarietà (154 cooperativis sociâls aderentis, une trentine chês che a operin intal setôr educatîf).
“I auments de bolete energjetiche a son daûr a causâ, in medie, la dopleade dai coscj; si zontin ancje i auments impuartants dai coscj dai servizis di cusine, dulà che ancje lis materiis primis, che a àn di rispietâ standard cualitatîfs precîs, a son cressudis dal 30-40 par cent a pet dal 2021”, al sotlinee Fontane. (ADG) – 7.10.2022