Al sarà Alessandro Brussi, za vice president dal Gruppo Danieli, a vuidâ la aziende, daspò de muart dal inzegnîr Gianpietro Benedetti ai 28 di Avrîl passâts.
Il Consei di aministrazion îr al à nomenât Brussi president ad interim, fintremai de assemblee che e varà di aprovâ il belanç dentri dai 30 di Jugn. Il gnûf cjâf de aziende al lavorarà in sinergjie cu la vicepresidente Camilla Benedetti e i doi aministradôrs delegâts Giacomo Mareschi Danieli e Rolando Paolone “par puartâ indenant cun impegn e dedizion adun cundut il Consei di aministrazion – si lei tal comunicât uficiâl – il disvilup des ativitâts operativis e la inovazion dal Gruppo Danieli”.
“Il Cda – al sclarìs il comunicât – nol à individuât nissune candidature buine par rimplaçâ l’inzegnîr Benedetti e al à calcolât che a sielzi e sedi la assemblee dai azioniscj, tant plui che la operativitât de societât e je in dut câs preservade in gracie dal sisteme corint di atribuzion des deleghis ai components dal Cda”.
Brussi al lavore te Danieli dal 1991 e al è cjâf e responsabil dal setôr aministratîf e finanziari dal grup: al sente intal Cda dal 2015 e al à cetantis incarghis intes societâts controladis e colegadis dal Gruppo Danieli”. (a.d.g.) – 15.05.2024
