L’ufici postâl di Maian al torne a vierzi, vinars ai 10 di Lui, dopo che a son stâts fats i lavôrs di inmodernament e ristruturazion par dâ acet ancje ai servizis previodûts dal progjet Polis, pensât di Poste italiane par furnî ancje i servizis de Aministrazion publiche.
L’ufici al à cambiade muse e la sale che e dâ acet ai clients e je stade rinovade cun furniments e colôrs gnûfs, indulà che e je ancje une corise a pueste par chei che no viodin.
Di la dai servizis postai, a saran a disposizion ancje chei dal Inps e anagrafics. Par di plui, in graciis de convenzion di Poste italiane cul Ministeri dal Interni e chel des Impresis e dal Made in Italy, i citadins a puedin cumò presentâ la domande par un passepuart gnûf o par rinovâ chel che za a àn, cence scugnî lâ a Udin inte Cuesture e cu la pussibilitât di ricevi il document diretementri a cjase lôr.
L’ufici al sarà a disposizion dai citadins cul orari di simpri: dal lunis al vinars des 8.20 di matine ae 1.45 dal dopomisdì e la sabide fintremai des 12.35. (a.d.g.) – 09.07.2026
