I progjets che a àn vinçût il concors “Fabbricando 2025” promovût de Danieli a saran premiâts sabide ai 24 di mai aes 8 di matine intal Centri ricercjis di Danieli & C. Officine meccaniche Spa, in vie Beltrame 30 a Buri.
Fabbricando 2025 e je une iniziative inmaneade de Danieli che, fintremai dal 2006, e cîr di judâ l’orientament dai fruts e sveltî chel dai zovins bande des dissiplinis Steam, ven a stai Science, Technology, Engineering, Art e Mathematics. Pensât par rinfuarcî il leam tra scuele e imprese, chest progjet al ufrìs ai fantats la pussibilitât di scuvierzi di dongje lis realtâts produtivis dal teritori, presentant progjets inovatîfs e inclusîfs tal setôr ambientâl, energjetic, digjitâl, de automazion industriâl e de comunicazion.
Par cheste edizion decime tierce a son stâts presentâts 57 progjets che a rivavin di 4 universitâts e 27 scuelis, cu la partecipazion di 768 students e 64 insegnants. Pe nestre regjon a àn partecipât scuelis des provinciis di Udin, Pordenon e Gurize. (a.d.g.) – 22.05.2025
