Lis clamin Kibs, sigle che te lenghe inglese e vûl dî ‘Knowledge Intensive Business Service’ e che e met adun lis impresis che a àn tant contignût di cognossince.
Il Friûl-Vignesie Julie, cu lis sôs 5.882 impresis di chest setôr, il 6% sul totâl, e je la cuarte regjon in Italie par incidence percentuâl, di pôc plui alte de medie taliane che e je dal 5,6%. Ai prins puescj de classifiche si cjatin Lombardie, Lazi e Venit. Il Trentin-Sudtirôl al ven dopo di noaltris, al cuint puest.
A contâlu il gnûf rapuart dal Centro studi de Cjamare di Cumierç Pordenon-Udin che al vise che lis impresis Kibs a son in cressite tal ultin an in dute Italie: in medie a son cressudis dal 3,7%, intant che inte nestre regjon la cressite e je stade dal 3%, ma cheste percentuâl e va su’ al 6,8% se si ten cont dal periodi dal 2019 al 2023. Lis 5.882 impresis di chest gjenar dal F-Vj ai 31 di Dicembar dal 2023 a jerin 2.893 tal teritori di Udin, 1.398 in chel di Pordenon, 1.114 a Triest e 477 tal gurizan. (a.d.g.) – 10.07.2024
