Inte citât francese si celebre il centenari de creazion de Scuele Mosaiciscj di Spilimberc, scuele uniche tal mont, che e à espuartât in ducj i continents miârs dai siei mosaiciscj.
La Lione antighe si clamave Lugdunum: cui che al dîs citât romane, al dîs mosaic roman, ma intal nestri câs è je soredut furlane. Lione e je ancje furlane propri in graciis des oparis dai furlans Mora, Facchina, Bertin-Castellan, stant che il lôr talent al è presint su edificis prestigjôs tant che la Basiliche di Fourvière, clamade la Capella Sistina dal mosaic, o intes criptis mistichis di Saint Nizier e Saint Pothin. La municipalitât di Lione e à metût a disposizion, tal cûr de citât, il sît prestigjôs dai Archives Municipales di Lyon dulà che la Scuele Mosaiciscj dal Friûl e esponarà oparis unichis tal mont di Novembar 2022 fin a Març 2023. (A.D.G.) – 27.06.2022
