Al è rivât dai Stâts Unîts, pe precision di Cleveland in Ohio, dulà che la sô famee e vîf aromai di trê gjenerazions, par visitâ il lûc dulà che al è nassût il nono, par cjatâ fûr lis propriis lidrîs e donâ une sume impuartante di bêçs ae Scuele Mosaiciscj dal Friûl di Spilimberc. E je la storie di David Zavagno che, acompagnât de femine Denise, al à fat visite ae citât di dulà al jere partît intai Agns 20 dal secul passât il nono Enrico. Il nono a Cleveland al à fondât une ativitât imprenditoriâl floride specializade inte lavorazion di marmui e ancje inte esecuzion di mosaics. I Zavagno a àn visitât vinars ai 6 di Mai la Scuele Mosaiciscj che a vevin sintût fevelâ dai familiârs. A spietâju il president de Scuele Stefano Lovison e il diretôr Gian Piero Brovedani. Ae visite a àn partecipât ancje Giovanni Travisanutto e di so fi Fabrizio, ex arlêfs de Scuele e vuê titulârs di un laboratori di mosaic che la sô ativitât e je lade dentri ben intal marcjât american.
Daspò vê cjatât i students e vê augurât lôr di deventâ testemonis de art musive, Zavagno, propit par dimostrâ il preseament pal lavôr formatîf che la Scuele e je daûr a condusi, al à consegnât intes mans dal president e dal diretôr une donazion dal valôr di dîs mil euros, a non so e de femine Denise. Al à volût consegnâ al diretôr Brovedani ancje doi atestâts di stime de bande de Ambassade e de Associazion americane che e da adun lis impresis di marmul e mosaic: un leam inviât intai agns Trente, mai cidinât e vuê rinovât. Adg
