De Argjentine ae tiere dai lôr vons par “Studiâ in Friûl”

I students argjentins che a frecuentin lis scuelis superiôrs de regjon in graciis dal progjet “Studiâ in Friûl” a son stâts ricevûts a Udin di Giuseppe Morandini, il president de Fondazione Friuli, e di Loris Basso, president dal Ente Friuli nel Mondo, lis realtâts che a sostegnin fin de prime edizion il progjet di interscambi pai dissendents dai coregjonâi tal forest. La iniziative, che e je ae sô vincjesime seconde edizion, e je promovude dal convit nazionâl ‘Paolo Diacono’ di Cividât, dulà che i fantats a son restâts par dut l’an scolastic. A son 20 fantats e fantatis dai 15 ai 17 agns – ducj dissendents di emigrâts in Argjentine –, che a àn volût tornâ inte tiere dai lôr vons par riscuvierzi lis propriis lidrîs e cjapâ contat cui lûcs e lis fameis di divignince. Ma ancje par sperimentâ di dongje la culture, lis tradizions, la lenghe e i valôrs che a son stâts lôr stramanâts. (A.I.) – 01.06.2023