“La mari dal popul furlan e je chê de braùre pe apartignince a une comunitât che e à i valôrs fuarts de identitât e de laboriositât. Parcè che, sparniçâts intal mont, i furlans a son tant che lis tessaris di un mosaic, che unidis a rapresentin un alc di unic e di grant leât a fuart ae tiere di origjin”. Lu à dit lunis ai 6 di Fevrâr, colegade in videoconference, l’assessôr regjonâl aes Financis Barbara Zilli, dilunc de cerimonie che si è fate inte sale conferencis dal Istitût Talian di Culture di Pechin, dentri de Ambassade di Italie, pe gnove viertidure dal Fogolâr Furlan inte capitâl cinese dopo un periodi di inativitât.
In cheste ocasion al è stât inviât ancje il progjet, in colaborazion cui Ateneus di Udin e di Pechin, pe traduzion par cinês de opare di Pauli Diacun, che e rimonte al secul VIII, dedicade ae storie dai Langobarts (‘Historia Langobardorum’).
Dopo jessisi complimentade cu la fondadore e ex responsabile dal Fogolâr Furlan di Pechin, Cristine Lambiase, pe nomine a rapresentant in Friûl-Vignesie Julie dal Ministeri dai Afârs Forescj, l’assessôr al à indreçât un salût al president di cumò dal Fogolâr, Daniele Macuglia (inte foto): “che nus unìs la stesse lidrîs glemonate e che vuê al rapresente in Cine, inte sô vieste di academic, un espuartadôr di grancj savês ae pâr di un altri professôr furlan tant che Sergio Cecotti, che al insegne ancje lui ae Universitât di Pechin”. Macuglia, docent di Storie dal pinsîr sientific ae Universitât di Pechin, al à cjatât il supuart di Laura Pani, paleografe de Universitât di Udin, e dal diretôr dal program di talian de scuele di lenghis forestis de Universitât di Pechin, Cheng Mo.
La cerimonie e à riclamât une cuarantine di furlans, che a vegnin ancje di altris citâts, e si concludarà cuntune cene cun menù furlan. “I furlans – al conclût Macuglia – a son restâts in pôcs, ma a son daûr a dâ tant di fâ. O sin plens di entusiasim e o volìn tignî altis lis bandieris dal Friûl e de Italie in Cine”. (A.D.G.) – 08.02.2023
